Nuevu númaru d’El Llumbreiru
Yá está disponible pa la súa descarga’l númaru 66 de la revista trimestral El Llumbreiru, que la nuesa asociación vien publicando dende l’añu 2005. Cumo n’outras ocasiones, los nuesos llectores van atopar conteníos relativos a las llenguas minorizadas de la nuesa provincia y testos lliterarios n’asturllionés. Asina, nesti númaru tenemos la segunda parte d’un artículu dedicáu al cineasta John Ford, escritu por Severino Alonso, asina cumo una buena riestra de novedades sobre la llengua asturllionesa y gallega, que resumimos embaxo:
Dende Madrí mos chega la noticia de la criación d’un grupu de trabayu pa la revisión de la normativa de las llenguas rexonales, dalgo qu’interesa abondo en Zamora, onde se falan tres llenguas reconocidas oficialmente. Tamién nel campu de la política recoyemos la propuesta de IU na Deputación de Zamora, que pidíu qu’esta alministración pueda aceptar escritos en gallegu.
Por outra parte, recoyemos interesantes iniciativas culturales d’outras provincias, cumo son la criación del ‘Paseo de las Palabras Perdidas’ nel llugar salamanquinu de Cepeda, l’apueste pola toponimia tradicional en Miranda l Douro, que vai poner más de 1.400 placas bilingües mirandés-portugués nos puebros del conceyu, o las xornadas sobre’l llionés na tradición oral celebradas en Llión nel mes de santamarina.
Nel campu de la investigación destacamos nuevos estudios sobre la fala de Ruidenore, feitos dende la Universidá d’Alcalá d’Henares, asina cumo’l trabayu sobre la fala sayaguesa que’l filólogu Pablo Rodríguez vien de realizar na Universidá de Salamanca.
Tamién amentamos la publicación de llibros de gran interés cumo ‘Cuaderno de últimas voces’, de Leticia Ruifernández y José Luis Gutiérrez, ‘Diccionario del habla de Sayago’ d’Ángel Piorno o ‘La lengua leonesa. Literatura y textos’, obra de Nicolás Bartolomé Pérez, José Ramón Morala y Roberto González-Quevedo.
Por outra parte, recordamos qu’aínda se pueden presentar trabayos a la primeira edición del concursu de Fotografía y Toponimia de la Provincia de Zamora. Tamién amentamos outras noticias culturales cumo son las audioguías n’asturllionés nel Muséu de los Puebros Llioneses de Mansilla de las Mulas o el Premiu al Meyor Cantar n’Asturias, qu’esti añu tien cumo finalista el cantar en senabrés ‘El que conoz a tierra’.
