Día internacional de la llengua materna, tamién en Zamora
Güei, 21 de febreiru, ye’l Día Internacional de la Llengua Materna. La iniciativa cuayóu nel añu 1999, cuando la UNESCO decidíu aprobar esta fecha pa celebrar la diversidá lingüística y cultural del mundu. Son muitas las llenguas amenazadas houguaño; calcúlase que nel conxuntu del planeta’l 40% de la población nun tien accesu a una educación na sua llengua materna, lo que supón una grandísima perda cultural y amuestra un intolerable despreciu por parte de las sociedades y gobiernos modernos hacia los dereitos lingüísticos de los falantes.
Dende Zamora queremos tamién sumanos a esta celebración, pues tenemos na provincia dúas llenguas minorizadas: l’asturllionés y el gallegu. De las dúas, solo’l gallegu tien presencia nel sistema educativu, mas d’una maneira mui exigua, mientras que l’asturllionés está ausente dafeitu en tódolos niveles d’enseñanza. Esto convierte al gobiernu de la Xunta de Castilla y Llión, en concretu a las Conseyerías d’Educación y de Cultura, Turismu y Deporte, nunos de los principales axentes glotocidas qu’están acabando cola nuesa diversidá lingüística, pues son las únicas instituciones que tienen competencias nesta materia.
Recordamos qu’añu tras añu’l Conseyu d’Europa vuelve pidir al gobiernu castellanu y llionés que tome mididas pa protexer l’asturllionés y el gallegu na comunidá autónoma, pues dambas llenguas están reconocidas nel Estatutu d’Autonomía y la Carta Europea de las Llenguas Rexonales, aprobada pol Estáu Español en 2001, obriga ello. Ello ye que, si atendemos a la lexislación vixente, tanto’l gobiernu español cumo los autonómicos han tomar mididas pa la protección de tódalas llenguas reconocidas que se falan drento del estáu, sían o non oficiales.
Recientemente l’Asociación Faceira denuncíu públicamente esta situación ante los responsables europeos, faciendo notar que la Xunta de Castilla y Llión inda nun incluyíu al asturllionés nel sistema educativu (artículu 7.1.c de la CLRM), nun desarrollóu nenguna midida práctica pa la sua promoción (artículu 7.1.c de la CLRM), nun facilita’l sou usu na vida pública y privada (artículu 7.1d de la CLRM) y nun desarrollóu lexislativamente l’artículu 5.2 del Estatutu d’Autonomía.
Pa falar d’estas y outras cousas, Furmientu estará güei nel programa de radio Hoy por hoy Zamora, de la Cadena Ser. Nun vos lo perder:
