Premiu de Lliteratura en llionés ‘Caitano Álvarez Bardón’
L’Institutu Llionés de Cultura acaba de convocar un importante concursu de lliteratura n’asturllionés. Esti certame lleva’l nome del escritor carrizanu Caitano Álvarez Bardón, y está abiertu a trabayos de poesía, de narrativa (conxuntos de relatos y novelas cortas), asina cumo d’ensayu y teatru.
L’Estatutu d’Autonomía de Castilla y Llión di que “el leonés será objeto de protección específica por parte de las instituciones por su particular valor dentro del patrimonio lingüístico de la Comunidad”. Precisamente esti concursu ñaz col oxetivu de promocionar la llengua asturllionesa, particularmente las variedades de la mesma faladas na provincia de Llión, tal cumo recueyen las bases. La mayor parte d’ellas estarían drento del conxuntu del asturllionés occidental. Tal ye’l casu del pal.luezu, el bercianu, el cabreirés o’l llionés centro-occidental, una modalidá que s’estiende tamién pol occidente zamoranu.
Caitano Álvarez Bardón (1877-1924) fuei un investigador, escritor y militar que ñacíu en Carrizu de la Ribera (Llión). Nel sou llibru ‘Cuentos en dialecto leonés’ aparez un buen feixe de relatos escritos nas falas tradicionales del Órbigu, La Cepeda y la zona oriental d’El Bierciu, siendo esti outor unu de los pioneiros del cultivu lliterariu n’asturllionés d’esta rexón.
El premiu tien una dotación de 3.000 euros y el/la ganador/a verá tamién la sua obra publicada en papel con una tirada inicial de 250 exemplares. El prazu de presentación escomienza l’unu de sanxuán y acaba’l dous de setiembre de 2021.
