‘Lluna de collecha’, cantar en senabrés
El grupu de música asturianu Herbamora acaba de sacar a la lluz un cantar en senabrés chamáu ‘Lluna de collecha’. Trátase del single del sou nuevu trabayu discográficu ‘286 Llunes’, que van presentar n’Asturias el prósimu vienres 29 d’esti mes de los santos.
La composición cuerre a cargu de Ruth Suárez, y parte d’una melodía tradicional de Riballagu, que se cantaba na siega, un llabor «onde'l trabayu de les muyeres yera mui pocu valoráu», dicen las outoras. «Con tou y con eso, la siega yera una fiesta, un motivu de cortexu, d'alcuentros y aprendizaxes, polo que pa nós presentar esti tema ye pensar nel nuestru raigañu, na nuestra semiente, nes nuestres güeles y más, que fueron y van ser los nuestros referentes», añaden.
La lletra ye una adaptación al senabrés d’un cantar qu’en Senabria se conoz en castellanu. La versión en llengua tradicional está feita pol lingüista Fernando Álvarez-Balbuena.
A siega (Riballagu, Senabria)
Uollos ñegros son traidores,
os azules son xoldreiros
y os acastañadicos
son firmes y verdadeiros.
Esos uollos que me miran
nun son os acostumbraos,
que nal mirar se conoce
qu’están os tiempos cambiaos.
Cuando you te quisi a ti
estaba ciega y nun vía;
pero yá cayíeu a venda
que tan ciega me tenía.
Herbamora son un grupu de cinco pandeireteiras asturianas, formáu en 2003 y que cunta con una llarga traxectoria. Houguañu la banda está integrada por Elena Rodríguez Martínez, María Gavieiro Álvarez, Paula Cristóbal Caso, Natalia Nuño Rodríguez y María Vázquez Álvarez.
