El PSOE de Castilla y Llión pide protección pal llionés
La sumana pasada’l grupu parlamentariu del PSOE nas Cortes de Castilla y Llión pidíu a la Xunta que tome mididas pa protexer l’asturllionés en la Comunidá Autónoma, una llengua falada por alredor de 25.000 personas nas provincias de Llión y Zamora.
Los procuradores Yolanda Sacristán y Diego Moreno declaronen na ruedra de prensa que se trata de “una llamada de auxilio para salvar el patrimonio lingüístico de la lengua leonesa”. Aseguronen que’l sou partíu dará un prazu de 6 meses al gobiernu autonómicu; si nun se fa nada, presentarán una proposición de llei pa protexer el llionés. Recuerdan qu’esta llengua está reconocida nel Estatutu d’Autonomía de Castilla y Llión y que, sicasín, dende la sua inclusión en 2007, nun se fizo nenguna clas de desarrollu lexislativu orientáu a la sua protección y promoción.
Castilla y Llión peique ye la única Comunidá Autónoma española que, teniendo reconocidas dúas llenguas propias nel sou Estatutu d’Autonomía (el llionés y el gallegu), nun desarrolla mididas prácticas pa la sua promoción y conservación. Los socialistas piden a la Xunta que cumpla la llei y dicen que “lo haga cuanto antes, porque cada día que pasa, la lengua leonesa se acerca un poco más a su desaparición”. Los procuradores añadionen: “Ya no valen las excusas. Es hora de que la Junta se tome en serio la protección y la promoción del leonés, antes sobre todo de que sea demasiado tarde”.
