‘Eternamente nel amiente’, nuevu llibru en senabrés
La outora senabresa María José Zurrón del Estal presenta güei’l nuevu llibru ‘Eternamente nel amiente’. Trátase d’una publicación billingüe, con doce relatos en senabrés y varias poesías, cona sua correspondiente traducción al castellanu. Está editáu por Semuret -en facendeira cona Deputación de Zamora- y cuenta tamién con abondosas ilustraciones del dibuxante senabrés Laureano del Estal.
Nos sous relatos amúestrase una literatura que bebe de la tradición oral y de lo vivencial, fundiendo las suas rayices nos cuentos populares y hestorias que se cuntaban nos puebros de la comarca. Dende la sua visión personal, l’impulsu creativu de la outora revive, recrea y resingnifica la vieya narrativa popular, onde’l mitu y la vivencia muitas veces s’amayuelan hasta facese indistinguibles. Con ello ríndese homenaxe a esi peculiar sentir y entender las cousas de las xentes de Senabria, todo ello feito por una senabresa y na llengua tradicional.
Cada relatu vien con dúas ilustraciones, elaboradas pol dibuxante Laureano del Estal, nas que predominan dúas colores, l’azul de l’arquitectura senabresa y el niegro de la ropa y las miserias de la vida dura d’outros tiempos, inda nun tan llonxanos. Laureano del Estal y María José Zurrón vienen trabayando nesta obra dende’l 2014, nun llabor nel que rescampla la perfecta simbiosis entre la imaxen y la narrativa.
María José Zurrón ye bien conocida nel ámbitu de la literatura n’asturllionés na nuesa provincia. Dalgunos de los sous textos fonen publicaos na revista El Llumbreiru y en dellas antoloxías cumo Onde la palabra pousa y na edición conmemorativa d’El dialecto leonés. Dende estas llinias queremos dar la norabona a los outores y a tódolos que facen posibre que trabayos cumo esti veyan la lluz.
