Pallabra de la sumana: cenceñada
Dende Furmientu presentamos estos días la 'Pallabra de la sumana'. Trátase d'una campaña nas redes sociales cona que queremos promocionar una pallabra zamorana cada sumana, col oxetivu de promover el sou usu y divulgar el nuesu ricu y variáu padremoñu lingüísticu.
Las pallabras escoyidas pertenecen al ámbitu asturllionés, y aínda se pueden sentir en gran parte de la provincia. Onque'l castellanu estándar ye la llengua que s'impón dende ámbitos tan influyentes cumo'l sistema educativu o los medios de comunicación, dende Furmientu cuidamos que renunciar a las nuesas particularidades lingüísticas supón una perda mui importante del nuesu padremoñu asina cumo una grave amputación cultural.
Esta campaña quier ser tamién una chamada a la acción, nun momentu nel que la conciencia lingüística está escomenzando a medrar entre la ciudadanía. Cada día son más los zamoranos y zamoranas que reconocen el valor de las falas tradicionales y fomentan la sua recuperación, a traviés de la expresión falada y del cultivu lliterariu.
La primer pallabra escoyida, nestos días de fríu y ñieve, ye 'cenceñada'. Animamos a tódolas zamoranas y zamoranos a siguir dicendo estas formosas pallabras y a compartir esti pequeiñu tesouru de la nuesa cultura.
